Bakıda VII Beynəlxalq türk mədəniyyəti, incəsənəti və mədəni irsin mühafizəsi simpoziumu başa çatmışdır

Bakıda keçirilən VII Beynəlxalq türk mədəniyyəti, incəsənəti və mədəni irsin mühafizəsi simpoziumu başa çatmışdır.

AzərTAc xəbər verir ki, türk dünyasının öndəri, ümummilli lider Heydər Əliyevin 90 illik yubileyinə həsr edilmiş simpozium "Miras" Mədəni İrsin Öyrənilməsinə Kömək İctimai Birliyi, Qafqaz Universitetinin Qafqaz Araşdırmaları İnstitutu, Türkiyənin Səlcuq Universiteti və Türk Əl Sənətləri Araşdırma və Tətbiqetmə Mərkəzi tərəfindən təşkil olunmuşdur.

Azərbaycan, Türkiyə, İtaliya, Rusiya, İran və digər ölkələrdən olan alim və mütəxəssislərin iştirak etdikləri beynəlxalq tədbir türk dünyasında mədəni irsin araşdırılması, qorunması, təbliği, zəngin türk mədəniyyəti, incəsənəti, türk tarix və ədəbiyyatının dəyərləndirilməsi, türkdilli ölkələrdə mədəni və arxeoloji turizmin təbliği və digər mövzuları əhatə etmişdir.

Beynəlxalq simpoziumda 150-dək məruzə dinlənilmiş, müzakirələr aparılmışdır.

Xatırladaq ki, əvvəlki simpoziumlar Türkiyə, Misir, İspaniya və İtaliyada keçirilmişdir.

Azərbaycan.-2013.- 30 iyun.- S.6.